Настани

Во организација на фондацијата „Метаморфозис“ и „Слободен софтвер Македонија“, а по повод љубовта кон мајчиниот јазик, викендот на 16, 17 и 18 Септември 2005, 54 часа нон-стоп, ќе трчаме маратон за локализација на слободен софтвер.

Маратон за локализација е собир на доброволци кои во краток временски период преведуваат определено парче слободен софтвер од англиски на мајчин јазик, во нашиот случај македонски јазик.

Целта на овоj маратон е целосно да се преведе на македонски јазик канцеларискиот пакет Опенофис.орг 2.0.

За повеќе информации и доколку сте заинтересирани да помогнете посетете ја страницата со пријава на учеството.

Ја увидуваме потребата од употреба на слободниот софтвер на сите нивоа, почнувајќи од високо образовните институции, невладините организации, преку големите, средните и малите компании па се до домашните корисници.

Имајќи ја во предвид економската ситуација во државата и високите цени за лиценцирање на оперативни системи и софтверски продукти, а водени од светските движења и искуства во сите развиени и неразвиени региони во светот, како и повеќекратните бенефиции од користење на софтвер на мајчин јазик се организира овој настан и Ве повикуваме и Вие да се приклучите.

Една од главните придобивки е дека се работи за софтверски пакет кој е слободен и издаден под LGPL лиценцата и сите кои сакаат да користат софтвер на македонски јазик ја имаат таа можност слободно и бесплатно.

Идниот викенд на 23 април и 24 април на Електротехничкиот факултет во Скопје Слободен софтвер Македонија ќе организира Инсталационен фестивал.

Сакаме да им дадеме на компјутерските корисници во Македонија шанса да го испробаат ГНУ/Линукс бидејќи тој е одличен оперативен систем. Сакаме ваквиот собир да биде еден вид промоција и презентација која ќе ги избрка предрасудите што луѓето ги имаат за ГНУ/Линукс. Сакаме да придонесеме во користењето на легален софтвер. Сакаме да придонесеме во користењето на квалитетен софтвер.

Посетете ја www.slobodensoftver.org.mk/installfest/2005/ да ги прочитате сите информации како да дојдете и што да донесете.

Инсталфест e собир за инсталирање софтвер. На овој Инсталфест, ќе ви помогнеме да инсталирате ГНУ/Линукс на вашиот компјутер. Ако пак не сте заинтересирани да инсталирате ГНУ/Линукс, можете да дојдете и само да се информирате. Или можете да донесете систем со веќе инсталиран ГНУ/Линукс кој ви прави проблеми – ние ќе ви помогнеме да го средите.

Burn Fest е помалото братче на Инсталфестот. Ако сакате сами да си го средите компјутерот, тогаш можете да дојдете со празни дискови и да ги снимите најновите ГНУ/Линукс дистрибуции.

Присуството на настанот, како и целиот софтвер, е бесплатно.

ГНУ/Линукс е оперативен систем. Тој е брз, стабилен, безбеден и полн со можности. ГНУ/Линукс доаѓа со огромен број на апликации кој можете да ги користите во вашата секојдневна работа.

Најважната работа за ГНУ/Линукс е тоа што тој е слободен софтвер. Ова значи дека можете да го користите за било каква намена. Можете бесплатно да правите копии од софтверот и да им ги дадете на пријателите. Можете да го погледнете изворниот код на софтверот за да видите како тој работи или пак за да поправите некои грешки. Тоа се слободите кои доаѓаат со слободниот софтвер.

Информатичката технологија се повеќе навлегува во сите сегменти на општеството - тоа овозможува подобри комуникации, поефикасно работење, забрзан развој - но мора да внимаваме таа инфраструктура да биде слободна, врз неа да може да гради секој. Само така може да се гарантираат иновации и понатамошна еволуција на човековото општество.

ИТ инфраструктурата мора да биде базирана на отворени стандарди и протоколи. Микрософт не дава никакви гаранции за тоа - напротив досега го покажал спротивното. Како пример, Комисијата за информатичка технологија (КИТ), кое е тело на Владата, документите ги објавува во Микрософт Ворд формат. Микрософт има патенти над овие формати, што значи дека било кој граѓанин, за да комуницира со владата, ќе мора директно или посредно да го плати тој патент на Микрософт.

http://www.slobodensoftver.org.mk/freesoftwareflood/

Слободен софтвер Македонија дојде на идеја да ја искористи маркетинг кампањата на Микрософт (која собра многу луѓе од ИТ индустријата на едно место) во свои цели, и за време на конференцијата „Визија“ да им демонстрира дека софтверот може да биде и легален и бесплатен, но и што е најважно слободен.

Така Слободен софтвер Македонија од сопствени средства сними 1000 дискови и ги подели на ИТ професионалците од Македонија на 03.06.2004 пред почетокот на „Визија“ пред Универзалната сала. Операцијата симболично ја нарековме „Free Software Flood“ поради дождот и поради тоа може да се каже дека ги „преплавивме“ сите присутни со слободен софтвер.

Реакциите на луѓето беа пријатни. Со тоа што им овозможивме да видат само мал примерок од врвната софтверска технологија, се надеваме дека допревме до нив да увидат дека не мора (или не треба) да плаќаат лиценци кои само ги ограничуваат. Слободниот софтвер го ослободува корисникот во својата употреба на софтверот, овозможувајќи му учество во понатамошниот развој, неограничен пристап до информациите, практикување на слободата и споделување на плодовите на општиот развој со другите.