15 и 16 Април 2006, Народна Техника
Вовед
По двата успешни Инсталациони фестивали 2004 и 2005 година Слободен Софтвер Македонија веќе традиционално организира пролетен инсталационен фестивал на кој ќе можете, со помош на поискусни корисници, да инсталирате ГНУ/Линукс на вашиот компјутер.
Во попладневните часови ќе има работилници за развој на веб апликации со употреба на слободни веб платформи, локализација на слободен софтвер и запознавање со работата на македонскиот тим на википедија, најпознатата слободна енциклопедија.
Во вечерните часови се планирани панел дискусии на тема слободниот софтвер и софтверските патенти, авторските права и интелектуалната сопственост и импликациите за секој граѓанин во информациското општество.
Настанот претставува промовирање на слободниот софтвер и градење на заедница на корисници и поддржувачи. Погледнете го распоредот на активности.
Настанот ќе се одржи викендот (15.04 и 16.04) во просториите на Народна Техника во Скопје од 11 до 21 часот.
Сакаме да им дадеме на компјутерските корисници во Македонија шанса да го испробаат ГНУ/Линукс бидејќи тој е одличен оперативен систем. Сакаме ваквиот собир да биде еден вид промоција и презентација која ќе ги избрка предрасудите што луѓето ги имаат за ГНУ/Линукс. Сакаме да придонесеме во користењето на легален софтвер. Сакаме да придонесеме во користењето на квалитетен софтвер.
Инстал & Burn фестивал
Инсталфест e собир за инсталирање софтвер. На овој Инсталфест, ќе Ви помогнеме да инсталирате ГНУ/Линукс на вашиот компјутер. Ако пак не сте заинтересирани да инсталирате ГНУ/Линукс, можете да дојдете и само да се информирате. Или можете да донесете систем со веќе инсталиран ГНУ/Линукс кој ви прави проблеми – ние ќе ви помогнеме да го средите.
Burn Fest е помалото братче на Инсталфестот. Ако сакате сами да си го средите компјутерот, тогаш можете да дојдете со празни дискови и да ги снимите најновите ГНУ/Линукс дистрибуции. Видете ја листата на дистрибуции кои ги имаме.
Што да донесам?
Најавете се
Ве молиме напишете писмо на ако имате намера да дојдете на Инсталациониот фестивал. Ова не е задолжително – сакаме само да знаеме отприлика колку луѓе ќе дојдат.