До: Македонските компјутерски корисници
Тема: GNU/Linux Install & Burn Fest
GNU/Linux Install & Burn Fest
Содржина
- Што е Install Fest?
- Што е Burn Fest?
- Колку чини инсталирањето на GNU/Linux?
- Која е вашата мотивација за организирање на ваков настан?
- Кои сте вие?
- Може ли да инсталирам GNU/Linux и да си го задржам Windows-от?
- Дали ќе ми се расипе компјутерот?
- А може ли после тоа да го избришам линуксот ако не ми се свиѓа?
- Каде и кога ќе биде овој настан?
- Дали GNU/Linux ќе работи на мојот компјутер?
Океј, заинтересиран(а) сум. Што понатаму?
- Каде да се пријавам?
- Што треба да направам пред да дојдам на Install Fest-от?
- Што да донесам со мене?
- Како ќе инсталирате GNU/Linux на мојот систем?
- Што да правам откако ќе се вратам дома?
- Можам ли некако да ѝ помогнам на Слободен Софтвер Македонија?
- Други прашања?
Што е Install Fest?
Install Fest собир за инсталирање софтвер. На овој Install Fest, ќе ви помогнеме да инсталирате GNU/Linux на вашиот компјутер. Ако пак не сте заинтересирани да инсталирате GNU/Linux, можете да дојдете и само да се информирате. Или можете да донесете систем со веќе инсталиран GNU/Linux кој ви прави проблеми – ние ќе ви помогнеме да го средите.
Што е Burn Fest?
Burn Fest е помалото братче на Install Fest-от. Ако сакате сами да си го средите компјутерот, тогаш можете да дојдете со празни дискови и да ги снимите најновите GNU/Linux дистрибуции.
Што е GNU/Linux?
GNU/Linux е оперативен систем. Тој е брз, стабилен, безбеден и полн со можности. GNU/Linux доаѓа со огромен број на апликации кој можете да ги користите во вашата секојдневна работа.
Најважната работа за GNU/Linux е тоа што тој е слободен софтвер. Ова значи дека можете да го користите за било каква намена. Можете да правите копии од софтверот и да им ги дадете на пријателите. Можете да го погледнете изворниот код на софтверот за да видите како тој работи или пак за да поправите некои грешки. Тоа се слободите кои доаѓаат со слободниот софтвер.
Повеќе на www.slobodensoftver.org.mk/whitepaper
Колку чини инсталирањето на GNU/Linux?
Присуството на настанот, како и целиот софтвер, е бесплатно. Секако радо ќе примиме доброволни донации бидејќи сме прилично сиромашна НВО.
Која е вашата мотивација за организирање на ваков настан?
Сакаме да им дадеме на компјутерските корисници во Македонија шанса да го испробаат GNU/Linux бидејќи тој е одличен оперативен систем. Сакаме ваквиот собир да биде еден вид промоција и презентација која ќе ги избрка предрасудите што луѓето ги имаат за GNU/Linux. Сакаме да придонесеме во користењето на легален софтвер. Сакаме да придонесеме во користењето на квалитетен софтвер.
Кои сте вие?
Ние сме Слободен Софтвер Македонија, невладина организација формирана од луѓе кои секојдневно користат слободен софтвер во својата домашна и професионална работа. Како организација работиме на промовирање и дистрибуирање на слободниот софтвер во Република Македонија.
Може ли да инсталирам GNU/Linux и да си го задржам Windows-от?
Да, тоа се прави многу лесно. Изборот за кој систем да го користите ќе ви се прикажува при секое пуштање на компјутерот. Двата оперативни системи можат да живеат на еден хард диск.
Дали ќе ми се расипе компјутерот?
Кога станува збор за софтвер, секогаш постои можност нешто да се расипе. Тоа е ризик со кој ќе треба да се соочите. Но, имаме прилично големо искуство со инсталирање на GNU/Linux и ниту еднаш не се случилa поголема катастрофа. Ќе се потрудиме тоа да остане така и овој пат.
А може ли после тоа да го избришам линуксот ако не ми се свиѓа?
Може. Ќе ви дадем точни инструкции како да го вратите вашиот компјутер во првобитната состојба.
Каде и кога ќе биде овој настан?
Настанот ќе се одржи на 15.05.2004(сабота) и 16.05.2004(недела) во Малата сала на Градското собрание. Ќе започнеме во 11 часот и ќе работиме до 20 часот.
Дали GNU/Linux ќе работи на мојот компјутер?
GNU/Linux работи со разни видови на хардвер. Но има и некои на кои не работи. Ако знаете како, можете да проверите со каков хардвер располагате. Ако не знаете, едноставно донесете го компјутерот или пишете ни мејл.
Океј, заинтересиран(а) сум. Каде да се пријавам?
Пишете на info[AT]slobodensoftver[DOT]org[DOT]mk ако имате намера да дојдете. Ова не е задолжително – сакаме само да знаеме отприлика колку луѓе ќе дојдат. Се разбира можете да ни пратите и информации за вашиот компјутер за да можеме однапред да ви кажеме некои корисни совети. На пример информации за модемот кој го имате можат да бидат корисни бидејќи драјверите за модемите можат да бидат проблем. Исто така можете да ни пишете ако сакате да инсталирате некоја одредена GNU/Linux дистрибуција. Така ќе можеме да утврдиме колку луѓе сакаат една или друга дистрибуција и соодветно да се спремиме.
Што треба да направам пред да дојдам на Install Fest-от?
НАЈБИТНО е да направите резерва на важните датотеки: Правењето резерва од важните датотеки на вашиот компјутер е превентивна мерка. Значи од сѐ што е важно направете back-up. Ставете ги тие документи на друг хард диск или спржете ги на CD. Ако ви треба помош за ова, слободно пишете ни.
Направете простор на дискот: Препорачливото празно место на дискот е околу 5 гигабајти. Се разбира GNU/Linux може да се пикне и на помал простор. Ако не знаете како да го направите ова, тогаш истото ќе го направиме на фестивалот.
Дефрагментирајте: Ако знаете како да направите посебна празна партиција на вашиот диск која ќе се користи за GNU/Linux – направете го тоа. Ако не знаете, тогаш пред да дојдете, последното нешто што треба да го направите пред го ставите компјутерот во кола е да го дефрагментирате дискот. Ако не знаете и ова да го направите сами, тогаш дефрагментирањето може да се прави на фестивалот – но имајте на ум дека тоа ќе одземе време и ќе ја одоговлечи целата процедура. Први во редот за инсталацијата ќе бидат компјутерите кои дошле дефрагменитирани.
За да дефрагментирате во Windows, исклучете ги СИТЕ програми. ICQ, анти вируси, сѐ што има во трејот. Буквално сѐ. Потоа кликнете на Start, одете во Programs, па Accessories, па System Tools, па кликнете на Disk Defragmenter. Кликнете "OK", и потоа кога ќе биде побарано, кликнете "Start" во прозорецот кој ќе се појави.
Што да донесам со мене?
Куќиштето на компјутерот.
Глушецот, тастатурата, сите кабли, модемот – ако е надворешен, звучниците.
Мониторот. Во принцип можете да поминете и само со куќиштето, но доколку го донесете целиот систем тогаш ќе можете се да средите одеднаш и нема да мора да се соочувате со неочекувани проблеми дома ниту да чекате слободен монитор,глушец тастатура.
Сите книгички кои ги имате за хардверот: книгичката за мониторот е задолжителна.
Список на хардверот со кој располагате.
Празни дискови од 700 MB – ако сакате да земете копија од инсталираната дистрибуција дома.
Како ќе инсталирате GNU/Linux на мојот систем?
Ќе инсталирам GNU/Linux преку CDROM. Ќе ви помагаме сами да инсталирате или ќе инсталираме место вас – по ваша желба.
Што да правам откако ќе се вратам дома?
Вклучете го компјутерот и истражувајте. Ако имате прашања после инсталацијата – т.е. кога ќе стигнете дома, најдобро место за барање одговор секако е интернет. За почеток претплатете се на [ossm-members] (http://hedona.on.net.mk/mailman/listinfo/ossm-members/) листата и почнете да ја следите дискусионата група mk.comp.os.linux на серверот news.mt.net.mk.
Можам ли некако да ѝ помогнам на Слободен Софтвер Македонија?
Најдобар начин да ѝ помогнете на Слободен Софтвер Македонија е да се вклучите во проектите кои таа ги работи или да предложите и организирате нов проект. Секако финансиската помош секогаш е добредојдена.
Други прашања?
Дојдете и прашајте!
