Слободен софтвер Македонија - Софтвер

Податоци за употребата на слободен софтвер во приватниот и јавниот сектор во Р. Македонија

2смк — Wed, 07 Nov 2012 08:58:25 +0000

Според информациите собрани од страна на Државниот завод за статистика на Р. Македонија во 2010 и 2011 година употребата на слободен софтвер бележи раст во приватниот сектор (мали, средни, големи претпријатија) и јавниот сектор (министерства, агенции, јавни претпријатија и локална самоуправа).

Во 2010 година употребата на „бесплатен (open source) оперативен систем пр. Linux“ во приватниот сектор е 11%, при што постои значителна разлика помеѓу употребата на вакви системи во малите компании (до 50 вработени) каде употребата е 8,7% и големи (над 250 вработени) каде употребата е 28%. По класа на типот на дејсноста според Националната класификација на дејности предничат компаниите што се бават со „Финансиско посредување“ (класи 65, 66, 67) и „Деловни активности“ (класи 70-74). Во овој извештај не постојат посебни податоци за ИКТ секторот.

Во 2011 истражувањето на Државниот завот е подетално. Покрај употребата на „Оперативен систем пр. Linux“ каде според податоците е забележан раст од 10 процентни поени (просекот е 22,2% за целиот приватен сектор – а сите групи според големината на субјектите имаат отприлика ист процент на употреба од 21-23), во истражувањето има податоци и за употребата на друг слободен софтвер. Така, „Софтвер за интернет пребарувач, пр. Mozilla, Firefox“ користат 63,3% од компаниите (57,1% малите, 66,1 средните и 78.6 големите компании), а „Офис софтвер пр. OpenOffice“ користат 34,6% од компаниите (34,2%, 31,6%, 50,6% соодветно). Според дејностите употребата на „Open Source оперативен систем пр. Linux“ е најголема во одделот „Информации и комуникации“ каде 65,3% од субјектите користат ваков оперативен систем, потоа следат „Финансиските дејности“ со 51,6% и „ИКТ сектротот“ со 58,1. Најмалку субјекти што користат ваков систем има во „Градежништво“ - 18,8%.

Во истражувањето од 2012 година за деловните субјекти во Р. Македонија не се прибирани податоци за употребата на слободен софтвер.

Според истражувањето од 2009 во јавниот сектор Besplaten ("open source") operativen sistem (na pr., Linux) користеле 16.9% од субјектите. Поделени по групи 33,3% од министерствата го користеле овој оперативен систем, додека кај останатите субјекти употребата е помеѓу 13 и 16 проценти.

Во 2011 има пораст од 8 процентни поени. Употребата на Operativen sistem, pr., Linux 25.0
е 25% при што има незначителна разлика помеѓу централната и локалната власт. Незначителна разлика помеѓу локалната и централната власт постои и во процентот на употреба на „Софтвер за интернет пребарувач,. пр, Mozilla, Firefox, Chromium“ каде употребата е на високи 91,5 од сите субјектите во овој сектор. Употребата на „Ofis softver, pr., OpenOffice“ е исто така висока – 63,6% од сите субјекти користат ваков тип на софтвер.

За подетални информации видете ги официјалните соопштенија на Државниот завод за статистика на следниве URL-а:
http://www.stat.gov.mk/PrethodniSoopstenijaOblast.aspx?id=97&rbrObl=27
http://www.stat.gov.mk/PrethodniSoopstenijaOblast.aspx?id=76&rbrObl=27

Вести:

Складишта за GNU/Linux дистрибуции во соработка со Blizoo

Арангел — Thu, 10 May 2012 08:55:48 +0000

Слободен софтвер Македонија во соработка со Blizoo Ви го претставува http://mirror.blizoo.mk. Се работи за повеќе складишта на популарни GNU/Linux дистрибуции поставени на инфраструктурата на Blizoo. Поставувањето на mirror серверите е резултат на повеќемесечната соработка помеѓу 2с.мк и Blizoo.

Се надеваме дека постоењето на овие mirror сервери ќе им овозможи на граѓаните и компаниите во Македонија побрз и поедноставен пристап до слободниот софтвер кој што го користат. За секое од складиштата можете да најдете посебни инструкции за употреба.

Поставени се копии од складиштата на Ubuntu, Debian, Fedora, CentOS, EPEL и RPM Fusion.

Вести:

Организација

Ден на слободен софтвер

Миша — Mon, 29 Sep 2008 12:35:49 +0000

Слободен софтвер Македонија ќе го прослави денот на слободен софтвер на 4.10.2008 година организирајќи презентации за слободен софтвер и слободна култура.

За таа цел, во 14 часот на плоштадот Македонија, група уметници колаборативно ќе сликаат платно посветено и инспирирано од овој ден.

Претходно во 12ч. , во културниот центар Точка, заинтересираните ќе можат да дојдат и да се информираат околу идеите за слободен софтвер, слободна култура, како и да се запознаат со активностите на „Слободен софтвер Македонија“ и идеите за понатаму.

Во текот на целото ова време, ќе делиме дискови со слободниот оперативен систем Ubuntu Linux, модификуван токму за оваа пригода со дополнителни пакети и содржини од уметниците кои за овој ден ни се придружија. На дискот има и слободен софтвер за други оперативни системи како и филм за слободната култура.

Вести:

Конференција за печат за Firefox 3

2смк — Tue, 17 Jun 2008 15:46:51 +0000

Денес, Слободен софтвер Македонија одржа конференција за печат во НВО Инфоцентарот каде што ги информираше новинарите за официјалното издавање на верзијата 3 на популарниот прелистувач за Интернет Firefox, како и неговоиот превод на македонски јазик.

Новинарите беа запознаени со некои од новите можности на популарниот прелистувач и со некои детали за локализацијата.

По овие информации, претставниците на организацијата ги поканија сите присутни на забавата по повод издавањето на Firefox 3, што во среда ќе се одржи во културниот центар Точка, со почеток во 20 ч.

Вести:

Слободниот софтвер пишува правилна кирилица

2смк — Wed, 30 Apr 2008 18:15:04 +0000

Денес, 30.04.2008 г. во 11 часот, Слободен софтвер Македонија во просториите на НВО Инфоцентарот одржа кратка презентација за новинарите за кириличните можности на слободниот софтвер.

За презентацијата беше користена најновата верзија на GNU/Linux дистрибуцијата Ubuntu, која патем, е целосно локализирана на македонски јазик.

Оваа презентација всушност беше дополнување на штотуку започната кампања за кирилица која ја спроведуваат МИА и Идеа+ за промовирање на кирилицата во работата со компјутери. Во овој контекст, посебно внимание се посветува на изгледот на ракописните букви „д“, „т“ и „г“, како и на специфичните „е“ и „и“ со цртичка.

Презентацијата имаше за цел да ја запознае пошироката јавност со можностите на слободниот софтвер од ова поле. Поточно, дека овие букви се достапни во слободниот оперативен систем во повеќе програми и веќе можат да се користат.

Вести:

Локализација

Извештај за проектот за локализација на Федора

2смк — Fri, 25 Jan 2008 18:23:17 +0000

Проектот за локализација на Федора кој овозможи 5000 дискови со слободен софтвер да бидат поделени во Македонија изминативе месеци и формално заврши со поднесување на документи во Управата за јавни приходи.

Овде може да го преземете извештајот за проектот.

Прилог	Големина
inet-fedora-l10n-report.pdf	133.08 KB

Вести:

Проекти

Документи

Конференција за печат по повод денот на слободен софтвер 2007

2смк — Wed, 12 Sep 2007 23:10:22 +0000

Слободен софтвер Македонија ќе одржи конференција за печат на 13 септември 2007 година во 12 часот во просториите на НВО Инфо центарот.

Конференцијата за печат ќе биде најава за активностите за денот на слободен софтвер кој оваа година се одбележува на 15 септември.

На светската прослава оваа година од Македонија и се приклучуваат 3 града. Скопје и Прилеп ќе прославуваат на 15 септемви, а во Битола настанот ќе го има својот ден една недела подоцна.

Во Скопје локациите за настанот се културниот центар Точка и кафе книжарницата Магор од 11 до 18 часот и националната галерија Мала станица во 20 часот.

Во Прилеп просавата ќе започне на плоштадот Александрија и пред саат кулата, а потоа ќе продолжи со презентации и работилници во Фондацијата за информатичка технологија

Официјалната најава за случувањата се наоѓа на Сподели знаење: врска.

Вести:

Информации за добивање материјали за Денот на слободен софтвер 2007

Игор — Thu, 19 Jul 2007 21:32:33 +0000

Слободен софтвер Македонија (најверојатно ќе) има на располагање 5000 DVD-а со Федора 7 на македонски и слободен софтвер за неслободниот Windows оперативен систем.

Сите оние кои сакаат да добијат определени количини од промотивниот материјал потребно е да испратат
е-пошта со што ќе изразат интерес за определена количина на дискови.

Откако ќе им биде одобрено барањето и ќе можат да ги подигнат дисковите, потребно е да донесат писмено барање адресирано до организацијата, потоа да поднесат извештај до 2С.мк каде ги дистрибуирале дисковите, кому и каков настан организирале во нивниот град, општина, училиште или слично, потребно е да достават и неколку фотографии од настанот.

Пријавените организатори на настаните можете да ги следите на следната вики страница http://wiki.lugola.net/SFD2007 координација може да се врши на irc.freenode.net #lugola.

Ова е прелиминарна информација и може планот да не се оствари (иако се надеваме дека тоа нема да се случи). Сепак, мислиме дека е добро со време да се види кој е заинтересиран за дискови.

Вести: