Слободен софтвер Македонија - Локализација

Предавање и работилници за проектот Mozilla

Игор — Tue, 14 Apr 2009 12:15:30 +0000

Отворена покана за сите заинтересирани дека на Факултетот за електротехника и информациски технологии во Скопје, на ден 15.04.2009 (среда) од 18 до 22 часот, во амфитеатарот на Факултетот, ќе имаат можност подобро да се запознаат со проектот Mozilla, на настан организиран од „Слободен софтвер Македонија“. На тој начин заинтересираните ќе имаат можност да ги продлабочат своите знаења од областа на употреба на Интернет технологиите и Интернет програмирањето.

Предавањата ќе ги водат: Сони Пирс (Sony PIERS), Арзел Јунзи (Arzhel YOUNSI) и Грег Костенобл (Grйgoire COUSTENOBLE), сите од Франција, истакнати придонесувачи на проектот Mozilla. Целта е да компјутерските корисници во Македонија добијат шанса одблизу да се запознаат со проектот Mozilla и оние кои го работат да видат каде и како можат да ги употребат неговите производи со цел подобро да си ги завршат своите задачи.

Во склоп на настанот предвидено е да се одржат две предавања/работилници:

* Техничко предавање: Firefox за веб програмери, отворени веб стандарди, прелистувач што е напишан според стандардите , HTML 5, новата структура за обработка на JavaScript, нови CSS можности;
* Предавање за крајните корисници: како да се користи web 2.0 во Firefox, демонстрација на отворени веб стандарди, интересни додатоци и можности.

Слободен софтвер Македонија е здружение на граѓани во Република Македонија формиранo од, претежно, млади луѓе кои секојдневно користат слободен софтвер во својата домашна и професионална работа. Како организација работи на промовирање на слободниот софтвер во Република Македонија.

Фондацијата Mozilla e непрофитна организација која постои за да обезбеди водство и поддршка на Mozilla проектот за слободен софтвер. Таа ги одредува насоките и стандардите при развојот на производите од проектот Mozilla. Најзначајните производи од овој проект се: интернет прелистувачот Mozilla Firefox, клиентот за електронска пошта Mozilla Thunderbird и во поново време интернет прелистувачот за мобилни уреди Mozilla Fenec.

Tурата по европските Mozilla заедници e замислена како три неделно патување на неколку членови на тимот на Mozilla во различни држави од Источна европа и Балканот во кои интернет прелистувачот Mozilla Firefox се користи на повеќе од 50% од компјутерите. Идејата на патувањето е да се промовира Mozilla, нејзината мисија да промовира отворени веб стандарди и да се сретнат локалните заедници кои го помагаат развојот на Firefox и останатите производи од Mozilla.

Турата можете да видите како напредува на следниов линк, на блогот на Mozilla. Гостите од Mozilla на нивната турнеја би требало прво да ја посетат Струмица, повеќе информации очекуваме од нашите пријатели од Струмица, а ќе ги објавиме на нашиот блог.

Вести:

Реакција по повод тендерот за локализација на Edubuntu

Миша — Mon, 26 May 2008 14:09:46 +0000

Во рамките на своите активности, „Слободен софтвер Македонија“ посветува значајно внимание на проблемите со локализација на слободниот софтвер на Македонски. Досега, организацијата, преку својата соработка со заедницата на корисници на слободен софтвер, има учествувано во локализација на позначајните софтверски пакети, како OpenOffice.org, Mozila Firefox, KDE, Gnome, Ubuntu Linux, Fedora Linux и др.

Поради овие локализациски активности, во Македонија е воспоставена заедница на локализатори кои веќе неколку години се грижат за превод на овие програмски пакети.

Имајќи предвид дека тендерот на USAID/AED/PEP (RFP 01/2008-ICT) за локализација на слободен софтвер за потребите на Edubuntu имплементацијата во образованието во Република Македонија, вклучува програми на кои веќе заедницата има работено, „Слободен софтвер Македонија“ има неколку забелешки:

1. Изненадени сме дека „Слободен софтвер Македонија“ не е консултирана, која е единствена во Република Македонија континуирано води грижа за локализација уште од самиот почеток на нејзиното основање. За овој тендер дознавме случајно, преку компании и организации кои ќе учествуваат на тендерот и побараа наша помош, бидејќи сме единствени кои имаме технички познавања од проблематиката;

2. Во оваа смисла, заобиколена е и заедницата на локализатори, која во текот на последните 10 години има инвестирано многу време и ентузијазам за да обезбеди значителен дел од множеството слободни софтверски пакети на македонски јазик;

3. Скоро сите софтверски проекти ја организираат локализацијата преку тимови за локализација кои се во редовна комуникација со матичниот проект и го „одржуваат" преводот. Без соработката со овие тимови, добитникот на тендерот нема да може да обезбеди финален производ. Никаде во тендерот не е наведена обврска на добитникот да соработува со овој локализациски тим ниту да се координира за терминологијата;

4. Значаен дел од програмите (според квантумот за преведување) се веќе локализирани. Зарем добитникот на тендерот ќе биде финансиски компензиран за работа која некој друг веќе ја направил?

5. Во тендерот, не постои ставка која бара од добитникот да ги врати преводите назад кон матичниот проект. Таквата ставка обезбедува поширока корист од преведените програми и дистрибуција на преводот надвор од образовните институции до сите корисници на софтверот.

6. Најмногу сме загрижени за кампањското третирање на локализацијата на програмите. Локализација значи континуирано преведување низ повеќе верзии на програмите, т.е одржување на превод, а не само еднократна активност. Со ваков начин на реализација на проектот, постои опасност од демотивирање на постоечката заедница на локализатори. Сметаме дека мора да се најде начин и да обезбедиме одржливост на веќе постоечките локализаторски процеси, кој ќе ја земе предвид заедницата чиј интерес е одржување на преводите.

Слободен софтвер Македонија стои на располагање за консултација за било кое прашање во врска со слободниот софтвер.

Вести:

Слободниот софтвер пишува правилна кирилица

2смк — Wed, 30 Apr 2008 18:15:04 +0000

Денес, 30.04.2008 г. во 11 часот, Слободен софтвер Македонија во просториите на НВО Инфоцентарот одржа кратка презентација за новинарите за кириличните можности на слободниот софтвер.

За презентацијата беше користена најновата верзија на GNU/Linux дистрибуцијата Ubuntu, која патем, е целосно локализирана на македонски јазик.

Оваа презентација всушност беше дополнување на штотуку започната кампања за кирилица која ја спроведуваат МИА и Идеа+ за промовирање на кирилицата во работата со компјутери. Во овој контекст, посебно внимание се посветува на изгледот на ракописните букви „д“, „т“ и „г“, како и на специфичните „е“ и „и“ со цртичка.

Презентацијата имаше за цел да ја запознае пошироката јавност со можностите на слободниот софтвер од ова поле. Поточно, дека овие букви се достапни во слободниот оперативен систем во повеќе програми и веќе можат да се користат.

Вести:

Локализација

Медиуми

Софтвер

Презентација на можностите на Лаптопот за секое дете (OLPC) во Скопје

Игор — Wed, 12 Dec 2007 10:35:55 +0000

На 12ти декември, среда, со почеток од 20:00 часот во Точка (позади Соборен храм) ќе се одржи кратка презентација на лаптопот XO, познат како лаптопот за секое дете. Настанот е организиран од страна на Слободен софтвер Македонија во склоп на проектот „Сподели знаење“. Еве го и распоредот за презентацијата:

Почеток на настанот. Вовед и објаснување за гостите.
Видео од презентација на Николас Негропонте - Директор на фондацијата OLPC дадена на конференцијата ТЕD
Образовните можности на OLPC
Технички спецификации и можности на OLPC презентација на 2 OLPC лаптопи

Слободен софтвер Македонија веќе целосно го локализираше на македонски јазик, софтверот кој што го користи овој лаптоп, a последната официјална верзија го вклучува и македонскиот превод.

Вести:

Стартување на OLPC проектот и во Македонијa

Игор — Thu, 22 Nov 2007 17:37:48 +0000

UNDP Македонија се подготвува за пилотирање на проект со 50 XO лаптопи од проектот OLPC. Слободен софтвер Македонија ја изрази својата подготвеност за соработка со овој документ уште во јули оваа година.

UNDP Македонија го почнала проектот во две училишта во Скопје. Слободен софтвер Македонија се уште не е контактиранa во врска со овој проект, па по се изгледа, нашиот интерес за соработка е одбиен.

Нашата мисија е да работиме за јавниот интерес, па според тоа и понатаму дел од нашата работа ќе биде меѓународниот проект OLPC. На UNDP Македонија им посакуваме успех во работата на овој проект, советувајќи ги да не ја игнорираат заедницата на корисници на слободен софтвер во Македонија. Оваа заедница и членовите на Слободен софтвер Македонија, веќе години наназад работи на поддршка и локализација на слободен софтвер на македонски јазик.

Нашата работа индиректно ја помага имплементацијата на нивниот проект овозможувајќи софтверот кој тие го користат да биде на македонски, а активни членови на заедницата работат на промоцијата на овој меѓународен проект веќе подолго време.

Прилог	Големина
2c.mk-olpc-expression-of-interest.pdf	185.78 KB

Вести:

Преведувачки маратон за ОО.о 2.0 - Втор дел

2смк — Fri, 30 Jun 2006 09:49:04 +0000

Во организација на фондацијата „Метаморфозис“ и „Слободен софтвер Македонија“, а по повод љубовта кон мајчиниот јазик, викендот на 30 јуни, 01 и 02 јули 2006, ќе се трча вториот маратон за локализација на помошта на веќе локализираниот OpenOffice.org 2.0

Тимовите за преведување овој пат се составени од информатичари и преведувачи од Филолошкиот факултет во Скопје.

Вести:

Од стара страница

Локализација

Настани

Маратонот заврши! ОО.о 2.0 зборува македонски!

2смк — Sat, 24 Sep 2005 14:40:55 +0000

Корисничкиот интерфејс на Опенофис 2.0 е целосно преведен на македонски јазик, како и 25% од помошта. Веќе излегоа и првите инсталациони датотеки за Линукс и слики од екранот на Опенофис.орг 2.0 на македонски јазик.

Ако сакате да го пробате како изгледа на Вашиот компјутер, бета нестабилни инсталациони датотеки можете да преземате од ftp.linux.cz За понатамошни информации за текот на уредување и финализирање на преводот посете ја http://mk.openoffice.org.

Вести:

Преведувачки маратон 2005

2смк — Fri, 16 Sep 2005 00:28:58 +0000

Во организација на фондацијата „Метаморфозис“ и „Слободен софтвер Македонија“, а по повод љубовта кон мајчиниот јазик, викендот на 16, 17 и 18 Септември 2005, 54 часа нон-стоп, ќе трчаме маратон за локализација на слободен софтвер.

Маратон за локализација е собир на доброволци кои во краток временски период преведуваат определено парче слободен софтвер од англиски на мајчин јазик, во нашиот случај македонски јазик.

Целта на овоj маратон е целосно да се преведе на македонски јазик канцеларискиот пакет Опенофис.орг 2.0.

За повеќе информации и доколку сте заинтересирани да помогнете посетете ја страницата со пријава на учеството.

Ја увидуваме потребата од употреба на слободниот софтвер на сите нивоа, почнувајќи од високо образовните институции, невладините организации, преку големите, средните и малите компании па се до домашните корисници.

Имајќи ја во предвид економската ситуација во државата и високите цени за лиценцирање на оперативни системи и софтверски продукти, а водени од светските движења и искуства во сите развиени и неразвиени региони во светот, како и повеќекратните бенефиции од користење на софтвер на мајчин јазик се организира овој настан и Ве повикуваме и Вие да се приклучите.

Една од главните придобивки е дека се работи за софтверски пакет кој е слободен и издаден под LGPL лиценцата и сите кои сакаат да користат софтвер на македонски јазик ја имаат таа можност слободно и бесплатно.

Вести:

Од стара страница

Локализација

Настани

Firefox и Thunderbird на македонски

2смк — Mon, 23 Feb 2004 01:22:51 +0000

Mozilla Firefox е слободен, open-source, меѓу-платформски и бесплатен веб прелистувач за Windows, Linux, MacOS X и други оперативни системи.

Firefox ви овозможува да ги извршувате вашите активности на интернет побрзо, посигурно и поефикасно одколку било кој друг интернет прелистувач.

Тој е мал, брз и лесен за користење, и нуди многу предности во однос на другите веб прелистувачи, како на пр. прелистување со табови и способноста за блокирање на непожелните скокачките прозорци. Повеќе информации ќе најдете на http://www.mozilla.com/en-US/firefox/.

Firefox e целосно преведен на македонски јазик.

Mozilla Thunderbird е моќен open-source клиент за е-пошта и дискусиони групи за 2004 година и иднината. Вратете ја функционалноста на вашата е-пошта.Вие сте повторно во контрола!

Мozilla Thunderbird поддржува напредна детекција и паметен начин да го отстраните отпадот во вашата пошта, вклучуваќи и многу други корисни можности. Повеќе информации ќе најдете на http://www.mozilla.com/en-US/thunderbird/.

Mozilla Thunderbird е исто така целосно превед на македонски јазик.

Вести:

Од стара страница

Локализација

Софтвер

Mozilla Firebird на македонски

2смк — Mon, 03 Nov 2003 02:47:13 +0000

Mozilla Firebird е слободен, open-source и меѓу-платформски веб прелистувач за Windows, Linux, MacOS X и други оперативни системи. Тој е мал, брз и лесен за користење, и нуди многу предности во однос на другите веб прелистувачи, како на пр. прелистување со табови и способноста за блокирање на скокачките прозорци. Од пред извесно време тој е преведен целосно на македонски. Повеќе информации и врска за преземање ќе најдете на http://mozilla.com.

Покрај Mozilla Firebird, беше преведен и прилагоден клиентот за електронска пошта, Mozilla Thunderbird.

Вести:

Од стара страница

Локализација

Софтвер