Слободен софтвер Македонија - Презентации

Реформа на Законот за матичен број на граѓанинот во РМ

Новица — Wed, 16 Nov 2016 15:42:15 +0000

На 15.11.2016 година во ЕУ инфо центарот во Скопје се одржа јавна презентација на препораките за реформи од проектот „Граѓаните во собрание“.

Слободен софтвер Македонија ја презентираше предлог-реформата за единствен матичен број на граѓанитот, која што предлага менување на законот со цел зголемување на приватноста на граѓаните и подобра заштита на нивните лични податоци.

Фотографија преземена од фејсбук страницата на „Граѓаните во собрание“

Матичниот број во формата во која се употребува во Република Македонија содржи лични податоци за граѓаните. Дирекцијата за заштита на личните податоци до сега идентификувала повеќе случаи на злоупотреба на матичниот број како што е неговото објавување во огласите во извршните постапки и евидентирањето во пријавниците во компаниите. Последен случај кој што го привлече вниманието на јавноста беше објавувањето на избирачкиот список од страна на Државната изборна комисија на начин на кој секој можеше да му пристапува и копира податоци од него. Бидејќи матичниот број лесно се пресметува, неограничениот пристап на веб страницата на ДИК остави најмногу простор за злоупотреби.

Оваа предлог реформа ја образложува потребата од поголема заштита на личните податоци на граѓаните преку промена на Законот за матичен број по примерот на Република Хрватска. Споредбата со законското решение на Република Хрватска не е случајна, Хрватска до пред 7 години го имаше истиот модел на матичен број како и Република Македонија, модел кој се употребувал во поранешна Југославија. Сепак, на патот кон евро-интеграциите Хрватска направи промена на Законот за матичен број и донесе нов Закон за личен идентификациски број кој не содржи лични податоци за граѓаните туку е составен од 11 цифри по случаен избор.

Истражувањето укажува дека моделот на идентификациски број што се користи во Република Хрватска овозможува поефикасна заштита на личните податоци и истовремено е во согласност со законодавството на Европската Унија. Препораката на оваа предлог реформа е Република Македонија да донесе нов Закон за матичен број и тој број да го пресметува по случаен избор како што е случајот со хрватскиот модел.

За предлог-реформата извести и Академик: http://www.akademik.mk/potrebna-e-reforma-na-zakonot-za-matichen-broj-po...

Вести:

Предавања за Слободен софтвер на ФИНКИ

Арангел — Sun, 11 Nov 2012 18:16:26 +0000

Почнувајќи од вторник 13-ти Ноември од 18 до 20 часот, на Факултетот за Информатички Науки и Компјутерско Инженерство (ФИНКИ), Слободен Софтвер Македонија ќе одржи серија предавања на тема Слободен Софтвер.

Првото предавање е на тема „Слободен софтвер технички и социо економски аспекти на слободен софтвер”. Предавачи ќе бидат Новица Наков и Дамјан Георгиевски. Присутни ќе бидат и останатите членови на Слободен софтвер Македонија, со цел да се претстави работата на хаклабот КИКА. Ова прво предавање претставува одлична можност да чуеме што всушност сакаат студентите да слушнат и научат, а со тоа и да ни помогнат да ги структурираме натамошните предавања.

Темите на предавањата кои се планирани може да се најдат тука.

Студентите и сите заинтересирани може да се пријават на следниот линк.

Се гледаме во вторник во 18 часот во просторија 115 ТМФ (Технолошко-Металуршки Факултет).

Преземете го постерот за настанот на линкот подолу:

Прилог	Големина
finki-2cmk-nastan1.png	129.44 KB

Вести:

Настани

Презентации

Учество на конференцијата Слобода и приватност на интернет во Скопје

Игор — Mon, 21 May 2012 14:29:27 +0000

Игор Стаматовски и Дамјан Георгиевски учествуваат на конференцијата за слобода и приватност на интернет организирана од Метаморфозис и Institut international des droits de l’homme et de la Paix (2IDHP).

Практични примери за енкрипција на податоци и користење софтвер за анонимно сурфање ќе споделуваат Александар Лазаров и Јованка Гулицоска.

Конференцијата се одржува на 21 и 22 мај, во Сити Хол во Скопје.

Темата презентирана во рамките на Сесија 1: Правна и институционална рамка на приватноста во ЕУ и во
Балканскиот регион, од страна на Игор Стаматовски беше Интернетот не заборава и беше фокусирана на предизвизите на членовите на заедниците на слободен софтвер за враќање на слободата на социјалните мрежи. Презентацијата се осврна на располагањето на корисниците на интернет со сопствените податоци и на кој начин социјалните мрежи им го оневозможуваат тоа. Како бизнис моделите на социјалната мрежа ги става луѓето во позиција на средства со кои социјалната мрежа располага, а вистинските корисници на социјалната мрежа се компаниите, владите итн. Беше презентирана и шанса како ние од кампот на слободниот софтвер гледаме на оваа ситуација и како да го решиме овој горлив проблем на 21 век со помош на иницијативата на проф. Ебен Моглен од Software Freedom Law центарот и фондацијата FreedomBox. Во спротивно предупреди Стаматовски, ни претстови нова лустрација која овојпат ќе се одвива за нашите животи кои сме ги објавиле, а социјалната мрежа макотрпно и систематски ги архивирала.

Дамјан Георгиевски го изложи своето видување на 22 мај на во рамките на Сесија 2: Државата и медиумите со презентација на тема Законот за авторско право и слободата на изразување. Тој се осврна на рестриктивноста на законот за авторски права, централизираноста на содржините и проблемот кој ваквиот рестриктивен закон го наметнува кога централниот авторитет ќе добие поплака од страна во врска со некоја содржина и нејзина недостапност. Ја објасни се потенката линија помеѓу задоволување на овој рестриктивен закон и се помалата слобода на говор која се постигнува со негов злоупотреба.

Фотографиите од настанот можете да ги погледнете подолу

Вести:

Конференции

Презентации

Работилници

2с.мк на Е-општество 2011

Арангел — Sat, 26 Nov 2011 15:48:43 +0000

Слободен софтвер Македонија и оваа година зеде учество во најголемата конференција во Македонија посветена на ИТ и електронското општество. Овогодинешната тема беше „ИКТ и животната средина: Приказна за отпадот“.

Презентација на темата „Користење на слободен софтвер со постар хардвер“ оддржа Арангел Ангов. Презентацијата можете да ја превземете на врската горе а повеќе за конференцијата можете да најдете на http://e-society.org.mk

Дополнување: Линк до видео од презентацијата.

Прилог	Големина
foss_e-waste.odp	134.77 KB

Вести:

Циклус јавни расправи по повод текстот на НПСС

2смк — Sat, 12 Mar 2011 19:29:37 +0000

Во понеделник почнува циклус на јавни расправи по текстот на Националната политика за слободен софтвер (НПСС).

Националната политика за слободен софтвер претставува акт кој после јавна дискусија ќе биде предложен за усвојување од Владата на Република Македонија. Оваа политика ќе уредува препораки за користење, набавка и поддршка на слободен софтвер и софтвер со отворен код тргнувајќи од претпоставката дека овој тип на софтвер е јавно добро.

Слободниот софтвер претставува оној тип на софтвер кој на корисниците им ги дава следниве слободи:

слобода во начинот на употреба на софтверот;
увид во тоа како софтверот е напишан;
слобода во тоа самиот софтвер да се менува, прилагоди и подобри;
слобода тие промени да се „вратат“ назад во заедницата.

Ваквиот софтвер им користи на различни целни групи. За студентите тој нуди увид во тоа како комплексен софтвер се програмира со што знаењето и вештините на огромен број стручњаци се пренесува кон помладите генерации. За бизнисите тој нуди зголемена конкурентност, бидејќи секој може да го редистрибуира и нуди како продукт. За власта тој нуди зголемена транспарентност и безбедност, бидејќи увидот во тоа како тој работи е отворен и достапен. Ова кумулативно се пренесува во заедничка општествена корист.

Јавните власти во Република Македонија веќе имаат искуство со имплементација и користење на слободен софтвер. Проектот „Компјутер за секој ученик“ скоро целосно работи со слободен софтвер и е една од поголемите имплементации во регионот и светот.

Циклусот настани се состои од јавни расправи во:

Тетово -- простории на центарот за балканска соработка Љоја 14.март.2011 во 13ч
Штип -- општинската сала 17.март.2011 во 14ч
Скопје -- Институт за информатика при ПМФ 21.март.2011 во 13ч
Битола -- Технички факултет 22.март.2011 во 11ч

Јавните настани се пред се наменети за три целни групи: академската заедница, бизнис секторот, граѓанските организации и претставници на локалната власт. Секако, на јавните настани може да дојде било кој заинтересиран граѓанин. На самиот настан, претставници на работната група ќе ја презентираат НПСС после што ќе се отвори дебата на која учесниците ќе можат да ги дадат своите сугестии. Настанот е предвиден да трае 2 часа.

Вести:

Презентација на роденденот на Википедија

2смк — Sun, 16 Jan 2011 16:50:58 +0000

На покана на Викимедија Македонија, Слободен софтвер Македонија одржа кратка презентација на роденденот на Википедија на 15.1.2011 г.

Презентацијата ја одржа Новица Наков. Целиот текст е достапен на врската подолу.

Ширење на хакерскиот дух: говор по повод 10 години Википедија

Вести:

Настани

Заедница

Презентации

Предавања на Институтот за информатика - Професионална етика

2смк — Thu, 25 Nov 2010 16:55:50 +0000

Дамјан Георгиевски и Новица Наков од Слободен софтвер Македонија на 24 и 25 ноември 2010 година одржаа две предавања за слободен софтвер за студентите од Институтот за информатика при ПМФ кои го слушаат предметот Професионална етика.

Часовите беа надополнети со снименото видео предавање на Ричард Сталман кое во мај 2010 се одржа во Скопје и со предавање од Кирил Симеоновски од Wikimedia Македонија кој зборуваше за Wikipedia и сестринските проекти.

Вести:

Заедница

Образование

Презентации

Предавање за митовите за слободниот софтвер

2смк — Wed, 10 Nov 2010 15:46:11 +0000

Денес, 10.11.2010 г. во рамките на работилницата за е-влада што ја организира USAID преку својот Egov проект, Дамјан Георгиевски од Слободен софтвер Македонија одржа кратка презентација за слободниот софтвер и митовите за неговата безбедност и сигурност.

Презентацијата траеше 10-тина минути и беше продлабочена со дискусија помеѓу присутните за другите нејаснотии кои постојат во јавноста во врска со карактеристиките на слободниот софтвер.

Вести:

Настани

Јавна администрација

Презентации

Предавање и работилници за проектот Mozilla

Игор — Tue, 14 Apr 2009 12:15:30 +0000

Отворена покана за сите заинтересирани дека на Факултетот за електротехника и информациски технологии во Скопје, на ден 15.04.2009 (среда) од 18 до 22 часот, во амфитеатарот на Факултетот, ќе имаат можност подобро да се запознаат со проектот Mozilla, на настан организиран од „Слободен софтвер Македонија“. На тој начин заинтересираните ќе имаат можност да ги продлабочат своите знаења од областа на употреба на Интернет технологиите и Интернет програмирањето.

Предавањата ќе ги водат: Сони Пирс (Sony PIERS), Арзел Јунзи (Arzhel YOUNSI) и Грег Костенобл (Grйgoire COUSTENOBLE), сите од Франција, истакнати придонесувачи на проектот Mozilla. Целта е да компјутерските корисници во Македонија добијат шанса одблизу да се запознаат со проектот Mozilla и оние кои го работат да видат каде и како можат да ги употребат неговите производи со цел подобро да си ги завршат своите задачи.

Во склоп на настанот предвидено е да се одржат две предавања/работилници:

* Техничко предавање: Firefox за веб програмери, отворени веб стандарди, прелистувач што е напишан според стандардите , HTML 5, новата структура за обработка на JavaScript, нови CSS можности;
* Предавање за крајните корисници: како да се користи web 2.0 во Firefox, демонстрација на отворени веб стандарди, интересни додатоци и можности.

Слободен софтвер Македонија е здружение на граѓани во Република Македонија формиранo од, претежно, млади луѓе кои секојдневно користат слободен софтвер во својата домашна и професионална работа. Како организација работи на промовирање на слободниот софтвер во Република Македонија.

Фондацијата Mozilla e непрофитна организација која постои за да обезбеди водство и поддршка на Mozilla проектот за слободен софтвер. Таа ги одредува насоките и стандардите при развојот на производите од проектот Mozilla. Најзначајните производи од овој проект се: интернет прелистувачот Mozilla Firefox, клиентот за електронска пошта Mozilla Thunderbird и во поново време интернет прелистувачот за мобилни уреди Mozilla Fenec.

Tурата по европските Mozilla заедници e замислена како три неделно патување на неколку членови на тимот на Mozilla во различни држави од Источна европа и Балканот во кои интернет прелистувачот Mozilla Firefox се користи на повеќе од 50% од компјутерите. Идејата на патувањето е да се промовира Mozilla, нејзината мисија да промовира отворени веб стандарди и да се сретнат локалните заедници кои го помагаат развојот на Firefox и останатите производи од Mozilla.

Турата можете да видите како напредува на следниов линк, на блогот на Mozilla. Гостите од Mozilla на нивната турнеја би требало прво да ја посетат Струмица, повеќе информации очекуваме од нашите пријатели од Струмица, а ќе ги објавиме на нашиот блог.

Вести:

Отворена дискусија: Интернет апликации - развој, маркетинг и промоција

Игор — Wed, 17 Dec 2008 22:26:34 +0000

На 22 декември (понеделник) во просториите на Културниот центар Точка со почеток во 17 часот, во организација на Центарот за нови медиуми и Слободен софтвер Македонија ќе биде организирана отворена дискусија на теми: производство на интернет апликации, развој на тимови, имплементација на различни методологии и технологии, интернет маркетинг и промоција.

Ќе се дискутира за:

Интернет стандарди
Front end интернет технологии
Кориснички интерфејс и тимови за развој (како тоа го прават големите компании)
Степенот на искористување и имплементација на достапните ресурси за развој на модерни апликации во Македонија
Примери на индивидуални и комерцијални интернет базирани проекти

Ќе зборуваат:

Ѓокица Зафировски, UI/IxD Engineer, Google, Личен блог
Проф. Игор Tрајковски, Њујорк Универзитет Скопје (google dropout), Time.mk
Дамјан Арсовски, it.com.mk
Деан Крстевски, broker.com.mk
Биљана Пешевска, Projectoffice.net
Дијана Димитровска, Active Reception

Влезот е слободен, а програмата е отворена, што значи може да се дополни се до последен момент доколку има заинтересирани за презентација на оваа тема.

Вечерта продолжува со Проекција:

„Навистина остварени детски сништа“ оддржано од професорот Ренди Појш од Универзитетот Карнеги-Мелон со последното Сподели Кино оваа 2008 година.

„Сите ние имаме детски соништа за тоа што ќе правиме кога ќе пораснеме. На пример: да бидеме астронаути, да снимаме филмови, да правиме видео игри. За жал, повеќето луѓе никогаш не успеваат да ги реализираат своите детски соништа, и сметам дека е навистина штета што тоа е така.
Јас имав неколку специфични детски соништа, и јас навистина ги реализирав повеќето од нив. Но поважно од тоа, најдов начин да им помогнам на многу млади луѓе да успеат и да ги реализираат нивните детски соништа со отварањето на Центарот за забавни технологии на универзитетот Карнеги-Мелон заедно со Дон Маринели“ - Ренди Појш, 23 Октомври 1960 - 25 Јули 2008 година.

Оваа дискусија претставува затворање на сезоната за повеќе настани кои се одвиваа во текот на 2008 во одделна организација на Слободен софтвер Македонија и Центарот за нови медиуми. Станува збор за Сподели кино и Сподели знаење во организација на Слободен софтвер и Face2Face (лице во лице) во организација на Центарот за нови медиуми.

Вести:

Настани

Презентации