Слободен софтвер Македонија - Документи

Реакција по повод Предлог законот за граѓанска одговорност за навреда и клевета

Миша — Mon, 08 Oct 2012 13:56:31 +0000

Денес 2с.мк достави писма до 123-те пратеници на Собранието на Република Македонија како реакција по повод предлог законот за граѓанска одговорност за навреда и клевета. Во тоа писмо организацијата им порача на народните претставници дека законскиот предлог, особено член 11 од предлогот може да има далекусежни негативни последици по слободата на говор на Интернет.

Истовремено, писмото беше и директно упатено и до Законодавно-правната комисија при Собранието како тело одговорно за разгледување на овој закон.

Во прилог е и текстот од писмото. Ве охрабруваме, и од свое име како граѓани, да го искористите писмово во своја реакција кон вашите претставници. Доколку навистина имате време, посетете ги и во канцелариите за пристап до пратениците.

Урнек текст:

Почитувани,

Со зголемен интерес и внимание го следиме донесувањето на новиот Предлог-закон за граѓанска одговорност за навреда и клевата.
Иако тој е со „европско знаменце“, сметаме дека не треба да се донесе избрзано и невнимателно решение.
Конкретно Ви пишуваме за Членот 11 од овој Предлог-закон. Во него се предвидува цитираме:
Одговорност на провајдерот на интернет-услуги

Член 11

(1) Провајдерот на интернет услуги превзема одговорност, заедно со авторот, за надоместување на штетата која произлегува од овозможување на пристап до навредливи или клеветнички информации.

(2) Провајдерот на интернет услуги не одговара за изнесена навреда или клевета како резултат на овозможување пристап до навредливи или клеветнички информации под услов доколу:

1) докаже дека авторот на информацијата објавена на веб порталот не дејствувал под директна или индиректна контрола или влијание од страна на провајдерот на интернет услугата, и

2) докаже дека не бил свесен ниту трeбал да биде свесен дека навредлив или клеветнички материјал е објавен на веб порталот, или, во рок од 24 часа откако станал свесен за навредливиот и клеветнички карактер на објавениот текст или информација, ги превзел сите технички и други мерки за отстранување на таквата информација. Барање за отстранување на информација може да поднесе и оштетеното лице.
Овој член ги обврзува интернет провјатерите и објавувачите на содржини на интернет да цензурираат содржини објавени од нивните корисници по барање на „оштетеното лице“, а не по судски налог врз основа на докажан и осуден прекршок. Сметаме дека Ова ефективно создава простор за цензура на интернет.

Бараме како наши избраници да не дозволите да се донесе закон кој ќе овозможи да се регулира говорот на интернет надвор од судски процес. Ако вакви законски решенија се носеа во демократските држави, интернет сајтовите како Youtube и Facebook немаше да постојат.
Апелираме до Вас да ја заштите Републиката и слободата на изразувањето гарантирана во Член 16 од Уставот.

Со почит,

Вести:

Поднесок од Слободен софтвер Македонија за проект на УСАИД за граѓанско општество

2смк — Fri, 10 Aug 2012 13:45:46 +0000

Во прилог на оваа објава се наоѓа документацијата која Слободен софтвер Македонија ја поднесе за проектот на УСАИД за граѓанско општество, како и дописот од ФООМ со кој бевме известени за статусот на оваа апликација.

Ги објавуваме на интернет во согласност со досегашната пракса за споделување на информации со заедницата и пошироката јавност.

Прилог	Големина
predlog-proekt.pdf	638.78 KB
predlog-proekt.odt	114.24 KB
BUDGET.odt	28.66 KB
BUDGET.pdf	617.6 KB
pismo-od-donatorot.png	2.03 MB

Вести:

Годишен извештај за работата на организацијата во 2011

Миша — Fri, 10 Aug 2012 12:13:55 +0000

Во прилог се наоѓа годишниот извештај.

Прилог	Големина
годишен извештај 2011	27.09 KB

Вести:

Писмо до Министерот за економија на РМ

Миша — Mon, 03 Oct 2011 09:57:17 +0000

Почитуван министер господин Ваљон Сараќини

Ви пишувам како претседател на здружението на граѓани „Слободен софтвер Македонија“, здружение посветено на промоција на слободен софтвер и слободна култура. Ова здружение, во изминатиот период ја менаџираше „КИКА“ -- културно-технолошки јавен простор сместен во просториите на ГеоИнститут Ц.О., кој поради поведување на стечајна постапка пред надлежниот суд, прејде во сопственост на Министерството за Економија. Во изминатите две години „КИКА“ беше простор каде технолошки ентузијасти, професионалци и експерти од Македонија разменуваа знаење и искуство, одржуваа работилници и предавања за најновите достигнувања во дигиталната технологија.

Бидејќи ни беше најавено дека од просторот треба да се иселиме, одлучив да Ви напишам писмо во обид да ве убедам дека во изминатиот период, просториите на ГеоИнститут ги исполнија интересни и корисни граѓански иницијативи. Овие граѓански иницијативи, без особено големи буџети креираа простор(и) во кои овозможија пристап до културни манифестации или технолошко знаење.

Имајќи го ова на ум, би ве замолил да изнајдете решение овие организации да останат во зградата или пак да добијат друг простор за да ја продолжат својата добра работа. Тоа не би бил преседан. Напротив, Вашата постапка ќе постави пример и во Македонија за соработка на државата со дел од граѓанскиот сектор кој нема големи финансиски средства, но е постојано во контакт со своите целни групи. Еден пример кој ние го знаеме е градот Пула, чија касарна во центарот на градот не е продадена, или претворена во административна зграда, туку подарена на граѓанскиот сектор. Таквата постапка била од огромно значење за локалниот граѓански сектор кој ја претворил во преубав центар за најразлични активности достапни за сите.
Јас можам да зборувам само од името на мојата организација и од името на просторот кој ние го менаџиравме. Во нашиот простор сите сервиси (програми) беа бесплатни и достапни до сите граѓани. Дозволете ми да ви објаснам што досега имаме направено, но и што планираме со „КИКА“.

Не само по урнекот на тоа што во минатото беше „народна техника“, туку и по урнекот на безброј слични иницијативи од Европа и САД, овој простор им обезбедуваше на луѓето пристап до вештини и знаење преку соработка, за автономна употреба на современите технологии. Таквата употреба има голема вредност, бидејќи технолошки ги описменува новите генерации, покажува начини за инкорпорирање на технологијата во нивните бизниси и производи, но придонесува и во научната и иновативната работа.

Во изминатиот период, нашата организација креираше неколку постојани програми за таквата размена на вештини кои веќе со години опстојуваат, а свое место најдоа во „КИКА“:

1. Прва таква програма е „Сподели знаење“: отворена работилница каде еднаш неделно се презентираат најновите технологии од полињата на експертиза на нашите членови. На овие работилници учесниците можат да научат за најновите иновативни достигнувања од областа на дигиталните технологии, а практично се изнаоѓаат начини како да се употребат во проекти од интерес на присутните учесници. Предавањата ги вршат наши членови и надворешни соработници, експерти во своите технолошки и општествени области на дејствување. Тие го донираат своето пазарно „скапо“ време, за да ги споделат своите знаења во јавноста.

2. „GNU/Linux прва помош“ е исто така неделна отворена работилница каде нашите членови им помагаат на корисници на GNU/Linux оперативните системи да ги решаваат своите проблеми. Оваа програма ја воспоставивме специфично во „КИКА“ делумно за да го адресираме интересот кој произлегуваше од владиниот проект „Компјутер за секој ученик“.

3. Во „КИКА“ секоја недела се одржува и отворена работилница посветена на учење програмски јазици каде заинтересираните учесници можат да се стекнат со напредни програмерски вештини од нашите членови експерти. Овие развојни технологии се вклучени во современите светски производи и сервиси како Google, Facebook, Android и сл.

Меѓутоа, нашата организација е дел и од една меѓународна активност наречена „НСНД“ каде технолошки ентузијасти од регионот се среќаваат неколку пати годишно на различни места за да ги презентираат проектите на кои работат, разменат искуство и иницираат заеднички проекти за соработка. Во оваа мрежа вклучени се луѓе кои доаѓаат од Албанија, Косово, Србија, Босна и Херцеговина и Хрватска. На крајот на месец мај оваа година еден таков настан беше одржан и во Охрид. Во периодот што следи, планираме и Скопје да биде домаќин на такви собири, а „КИКА“ простор каде тие ќе се среќаваат. Дополнително на ова, во соработка со организации од овие земји, планираме да воспоставиме мрежа на вакви слични простори налик на „КИКА“ во Скопје и култниот простор „МАМА“ од Загреб.

Поради сето ова наведено, би сакал да ја повторам мојата молба до Вас да се заложите овој простор да биде даден на користење на граѓанските иницијативи кои во дел од зградата овозможија да виреат интересни проекти од културата, уметноста и технологијата.

Се надевам на заедничка средба, каде подетално можеме да ги продискутираме горенаведените барања и активности.

Однапред благодарен,

Миша Поповиќ

Вести:

Информации за проектот „Сподели“ на англиски јазик

Арангел — Sat, 01 Oct 2011 13:43:53 +0000

Целиот текст е во датотеките прикачени кон оваа вест.

Прилог	Големина
spodeliproject.pdf	143.92 KB
spodeliproject.odt	191.18 KB

Вести:

Насоки за редовни состаноци на Слободен софтвер Македонија

2смк — Sun, 11 Sep 2011 19:05:47 +0000

Вести:

Овој документ ги дефинира правилата според кои здружението ќе одржува редовн состаноци во текот на годината:

1. Редовните состаноци на здружението се одржуваат секоја прва недела во месецот, или првиот следен ден доколку неделата е празник, со почеток во Хаклабот КИКА со почеток во 19:00 часот и траат 90 минути.

2. Се одржуваат 11 редовни состаноци, секој месец освен август.

3. Состаноците се отворени и секое заинтересирано лице може да присуствува.

4. Присуството за членовите е задолжително. Доколку некој член отсуствува два пати по ред или вкупно три пати во текот на годината собранието ќе му одреди статус на почесен член.

5. Состаноците може да имаат својство на собрание по барање на било кој член и кога претседателот тоа го најави согласно одредбите од Статутот.

6. Секретарот на здружението ги известува членовите за агендата на секој состанок најдоцна пет дена пред состанокот.

7. Агендата за состанокот секој месец ја изготвува различен член. Распоредот за ова ќе се состави на првиот состанок во 2011 година.

8. Агендата за привиот состанокот ќе ја состави секретарот на организацијата.

Забелешка: Овој документ го донесе собранието на Слободен софтвер Македонија на 13.02.2011 година во Скопје.

Апликација за средства за НВО од Град Скопје

Игор — Sat, 09 Jul 2011 14:23:06 +0000

Прилог	Големина
GradSkopje.zip	666.1 KB

Вести:

Во прилог на оваа вест се наоѓа целокупната документација за проектот со Град Скопје што го поднесе Слободен софтвер Македонија.

Програма за работа на 2с.мк за 2011 година

Арангел — Wed, 11 May 2011 11:34:55 +0000

Вести:

- ОДЛУКА за избор на органи.
- ОДЛУКА за прогласување на почесни членови.
- ОДЛУКА за прием на нови членови.
- ОДЛУКА за насоките за редовни состаноци на Слободен софтвер Македонија.

Во 2011 година „Слободен софтвер Македонија“ ќе продолжи со својата јавна дејност на промоција на слободен софтвер и слободна култура на локални, регионални и национални настани.

Истовремено, „Слободен софтвер Македонија“ ќе ја продолжи започнатата меѓународна соработка со организациите: Multimedialni Institut (Хрватска); Chaos Computer Club (Германија); Free Software Network (Србија); FSF Europe. За оваа година планираме неколку активности кои ќе се вклопат во програмските цели на организацијата и ќе имаат значаен удел во промоцијата на слободниот софтвер и културата на разменување (слободна култура).

1. Идејата за хаклаб е идеја за простор кој нема да биде само седиште на
организацијата, туку отворен културен простор каде ќе се негува хакерската култура во технолошка и културолошка смисла. Замислениот центар би бил налик на културен центар, но со специфична ориентација и програма, насочена кон: овозможување на простор и ресурси за работа на заеднички проекти, отворен простор за презентација на нови технологии, културен простор кој ќе презентира содржини од слободната култура, отворено место со интернет каде би можел да дојде било кој што се интересира и сака да дознае нешто ново. Хаклаб КИКА, финансиско и кадрово зајакнување на хаклабот се главните цели за 2011 година на ова автономна технолошка зона. Одржливоста ќе биде главниот предизвик на актерите кои се вклучени во заживување и промовирање на оваа слободна точка, каде што има реализација на предизвиците за секого кој има било каков интерес за хакирање на технологијата и општеството. Редовните настани GNU/Linux прва помош за кој што имаше интерес од јавноста, сподели знаење каде темите се разновидни а целта е размена на знаење и искуство, продолжување на соработката со НВО Компресор за организирање на сподели кино и поддршка на сите редовни активности во хаклабот КИКА.

2. Соработка со Метаморфозис и МИОА на проектот за национална политика за Слободeн софтвер во органите на централната власт на Република Македонија.

3. Хакерски собир со име „Ништо нема да се случи“ (НСНД): Отворен настан кој ќе се одржи во првата половина од 2011 г. во Охрид. На настанот ќе бидат поканети хакери од регионот на сесија во која ќе се разменуваат знаење и искуства.

4. Промоција на слободен софтвер и слободна култура. Слободен софтвер Македонија ќе ги поддржи следните настани поврзани со слободен софтвер во Македонија: Firefox 4 забава, Software Freedom Day, GNOME3 забава и Едно лето).

5. Сподели знаење и сподели кино надвор од Скопје. Ширење на хакерскиот дух низ Македонија и наоѓање на технолошки интересни групи кои недостасуваат или функционираат во другите градови во Македонија. Организирање и поддршка на настани заедно со локалните заедници од сите градовите во државата.

6. Ден на слободен софтвер: Настан кој традиционално се оджува во септември и е мрежа од интернационални случувања за промоција на слободниот софтвер. Оваа година во Македонија, значењето на одбележување на овој ден е проширено, бидејќи со проектите за компјутеризација на образованието, се случи голем пробив во користење на слободен софтвер. Оттука, во оваа година има повеќе засегнати страни (државните институции; бизнис заедница), а „Слободен софтвер Македонија“ ќе работи на тоа да ги вклучи сите нив во овој настан.

7. Изработка и објавување на студија за македонските проекти за локализација на слободен софтвер.

Целата програма за 2011 година, можете да ја најдете тука.

Собраниски извештај на 2с.мк

Арангел — Wed, 11 May 2011 11:33:21 +0000

На редовното годишно собрание на Слободен софтвер Македонија оддржано на 13.02.2011 год. (недела) во Хаклабот КИКА со почеток во 17 часот беа изгласани следниве документи:

Слободен софтвер Македонија оддржа и две вонредни собранија од кои што првото на 20.04.2011г. и второто на 07.05.2011г. Вонредните собранија беа свикани со цел да се донесат одлуки во врска со програмата на организацијата како и донесувањето на одлуки во врска со барањето на некои членови за суспендирање на нивното членство.

Записникот од годишно собрание можете да го најдете тука.

Записникот и документите од првото вонредно собрание можете да ги најдете тука.

Записникот од второто вонредно собрание можете да го најдете тука.

Вести:

Записници