Слободен софтвер Македонија - Образование

Предавања на Институтот за информатика - Професионална етика

2смк — Thu, 25 Nov 2010 16:55:50 +0000

Дамјан Георгиевски и Новица Наков од Слободен софтвер Македонија на 24 и 25 ноември 2010 година одржаа две предавања за слободен софтвер за студентите од Институтот за информатика при ПМФ кои го слушаат предметот Професионална етика.

Часовите беа надополнети со снименото видео предавање на Ричард Сталман кое во мај 2010 се одржа во Скопје и со предавање од Кирил Симеоновски од Wikimedia Македонија кој зборуваше за Wikipedia и сестринските проекти.

Вести:

Заедница

Образование

Презентации

Прирачник за пристапни опции во Edubuntu

Арангел — Wed, 14 Apr 2010 12:04:00 +0000

Слободен софтвер Македонија во соработка со фондацијата Метаморфозис и организациајта „Отворете ги прозорците“ го објави прирачникот за пристапни опции во Edubuntu и GNOME. Благодарение на посебните алатки достапни во оваа работна околина, на лицата со хендикеп (на пр. со оштетувања на видот, моторни нарушувања, интелектуална попреченост) им се овозможува да го користат овој оперативен систем без поголеми потешкотии.

Прирачникот е објавен под лиценцата Creative Commons 2.5 и е достапен за преземање од сајтот на Метаморфозис.

Вести:

Реакција по повод тендерот за локализација на Edubuntu

Миша — Mon, 26 May 2008 14:09:46 +0000

Во рамките на своите активности, „Слободен софтвер Македонија“ посветува значајно внимание на проблемите со локализација на слободниот софтвер на Македонски. Досега, организацијата, преку својата соработка со заедницата на корисници на слободен софтвер, има учествувано во локализација на позначајните софтверски пакети, како OpenOffice.org, Mozila Firefox, KDE, Gnome, Ubuntu Linux, Fedora Linux и др.

Поради овие локализациски активности, во Македонија е воспоставена заедница на локализатори кои веќе неколку години се грижат за превод на овие програмски пакети.

Имајќи предвид дека тендерот на USAID/AED/PEP (RFP 01/2008-ICT) за локализација на слободен софтвер за потребите на Edubuntu имплементацијата во образованието во Република Македонија, вклучува програми на кои веќе заедницата има работено, „Слободен софтвер Македонија“ има неколку забелешки:

1. Изненадени сме дека „Слободен софтвер Македонија“ не е консултирана, која е единствена во Република Македонија континуирано води грижа за локализација уште од самиот почеток на нејзиното основање. За овој тендер дознавме случајно, преку компании и организации кои ќе учествуваат на тендерот и побараа наша помош, бидејќи сме единствени кои имаме технички познавања од проблематиката;

2. Во оваа смисла, заобиколена е и заедницата на локализатори, која во текот на последните 10 години има инвестирано многу време и ентузијазам за да обезбеди значителен дел од множеството слободни софтверски пакети на македонски јазик;

3. Скоро сите софтверски проекти ја организираат локализацијата преку тимови за локализација кои се во редовна комуникација со матичниот проект и го „одржуваат" преводот. Без соработката со овие тимови, добитникот на тендерот нема да може да обезбеди финален производ. Никаде во тендерот не е наведена обврска на добитникот да соработува со овој локализациски тим ниту да се координира за терминологијата;

4. Значаен дел од програмите (според квантумот за преведување) се веќе локализирани. Зарем добитникот на тендерот ќе биде финансиски компензиран за работа која некој друг веќе ја направил?

5. Во тендерот, не постои ставка која бара од добитникот да ги врати преводите назад кон матичниот проект. Таквата ставка обезбедува поширока корист од преведените програми и дистрибуција на преводот надвор од образовните институции до сите корисници на софтверот.

6. Најмногу сме загрижени за кампањското третирање на локализацијата на програмите. Локализација значи континуирано преведување низ повеќе верзии на програмите, т.е одржување на превод, а не само еднократна активност. Со ваков начин на реализација на проектот, постои опасност од демотивирање на постоечката заедница на локализатори. Сметаме дека мора да се најде начин и да обезбедиме одржливост на веќе постоечките локализаторски процеси, кој ќе ја земе предвид заедницата чиј интерес е одржување на преводите.

Слободен софтвер Македонија стои на располагање за консултација за било кое прашање во врска со слободниот софтвер.

Вести:

Презентација на Лаптопот за секое дете (OLPC) во Прилеп

Игор — Sun, 06 Jan 2008 22:09:54 +0000

По успешните презентации на OLPC, во Скопје и Битола, Слободен софтвер Македонија во соработка со групата на корисници на Линукс од Прилеп, ЛугоП одржаа презентација на лаптопот за секое дете во овој град.

Овој лаптоп е ефтин и адаптиран за детските потреби и работи на база на слободен софтвер со оперативен систем Fedora на околина Sugar.

Презентацијата од околу 1 час се одржа во просториите на општина Прилеп. Секој имаше можност да го проба лаптопот.

На презентацијата имаше и видео материјали за овој зелен лаптоп, презентација на неговите можности и презентација за мисијата и целта на проектот.

Вести:

Македонија на насловните страници на Интернет за нејзините GNU/Linux активности

2смк — Thu, 20 Sep 2007 06:35:09 +0000

Проектот на Владата на Република Македонија за инсталирање на 180 000 работни станици со Ubuntu во училиштата е главна вест на повеќе места на Интернет изминативе денови:

Digg
DesktopLinux
MozillaLinks
Engadget

Или ако сакате уште вести секогаш можете да го прашате Google.

Едно е сигурно. Благодарение на вредниот преведувачки тимови на Ubuntu, GNOME, OpenOffice.org и Mozilla децата ќе можат веднаш да ги користат овие компјутери со софтвер на македонски јазик.

Вести:

Медиуми

Образование

Слободен софтвер во образованието

2смк — Wed, 22 Aug 2007 12:48:54 +0000

Вести:

Образование

Организација

Ние во Слободен софтвер Македонија мислиме дека во образованието треба да се користи слободен софтвер и сакаме да помогнеме тоа да се оствари. Нашата досегашна работа беше и е солидна база за неколку проекти во Македониија кои се занимаваа со ова прашање како проектот Е-школо и Проектот за основно образование.

Знаеме дека голем број на училишта имаат потешкотии со работата со слободниот софтвер и сакаме да помогнеме тие проблеми да се решат. Затоа ако ви е потребна помош, пишете ни.

Слободен софтвер Македонија соработува и со универзитетите. Сподели знаење е проект за приближување на слободниот софтвер до универзитетските студенти.

Слободен софтвер во македонското образование

2смк — Sun, 19 Dec 2004 13:20:27 +0000

Добрите вести тешко се пробиваат на виделина. Така по скоро цело завршено полугодие, дознаваме дека во македонските средни училишта се распределени 2000 компјутери (20 по училиште) на кои покрај Виндоус има инсталирано и Мендрејк Линукс.

Компјутерите се донација на кинеската влада, а дуал-бут опцијата е тука благодарение на USAID, EDC и Министерството за образование на Република Македонија. Сите активности се одвиваат преку проектот е-школо.мк.

Дел од активностите на овој проект е и информирањето на професорките и професорите по информатика за слободниот софтвер, можностите кои тој ги нуди, неговото значење за образованието итн. Така на 17.12.2004 во гимназијата „Орце Николов“ во Скопје, предавање на оваа тема одржа г-динот Алфонсо Наранхо, претставник на EDC.

Она што можеби беше најважно за ова предавање е дека таму беа присутни и претставници на Слободен софтвер Македонија. Професорите дознаа дека сето тоа зборување и предавање не е само теорија, туку дека има некоја група на луѓе кои активно се занимаваат со слободен софтвер, и дека има заедница која расте и која може да биде од голема помош.

Поради фактот што на професорите им беше јасно и недвосмислено кажано дека покрај USAID и Министерството за образование на Република Македонија подржува и инсистира употреба на слободен софтвер во наставата, искрено се надеваме дека слободниот софтвер ќе си го пронајде вистинското место во македонското образование, исто како што тоа го направи во образовните системи на полно високо развиени земји.

Зошто училиштата треба да користат само слободен софтвер?

Има општи причини зошто сите компјутерски корисници треба да инсистираат на слободен софтвер. Тој им дава на корисниците слобода да ги контролираат сопствените компјутери--со неслободниот софтвер, компјутерите го прават она што сакаат да го прават сопствениците на софтверот, а не тоа што сакаш ти да го правиш. Тој (слободниот софтвер) им дава слобода на корисниците да соработуваат меѓу себе, и да живеат чесен живот. Овие работи важат за училиштата, како што важат и за сите.

Но има посебни причини кој важат за училиштата.

Прво, слободниот софтвер може да им заштеди пари на училиштата. Дури и во најбогатите земји, училиштата немаат доволно пари. Слободниот софтвер, како на другите корисници, така и на училиштата, им дава слобода да го копираат и редистрибуираат софтверот, со што училишниот систем може да направи копии за сите компјутери во сите училишта. Во сиромашните земји, ова може да помогне во намалување на технолошкиот јаз.

Оваа очигледна причина е важна, но истовремено е и плитка. И развивачите на нелсободен софтвер можат да ја надминат овој нивен недостаток со донирање на копии на училиштата. (Внимавајте!--школото кое ќе ја прифати оваа понуда можеби ќе мора да плаќа за надградби во иднина.) Сега да ги погледнеме подлабоките причини.

Училиштата треба да ги учат учениците на начин на живот кој ќе кој позитивно ќе придонесува во општеството. Треба да ја промовираат употребата на слободен софтвер исто како што го промовираат рециклирањето. Ако училиштата ги учат учениците слободен софтвер, учениците ќе користат слободен софтвер кога ќе завршат со образованието. Ова ќе му помогне на општеството во целост да избега од доминацијата (и силеџиството) на мегакорпорациите. Тие корпорации нудат бесплатни копии на училиштата од истите причини заради кои тутунските компании дистрибуираат бесплатни цигари: за да ги направат децата зависни (1). Тие нема да им даваат дисконти на децата кога тие ќе пораснат и ќе матурираат.

Слободниот софтвер им дозволува на учениците да научат како софтверот работи. Кога учениците ќе дојдат во своите тинејџерски денови, некои од нив ќе сакаат да научат сѐ што може да се научи за нивниот компјутерски систем и неговиот софтвер. Таа е возраста кога луѓето кои ќе бидат добри програмери треба да учат. За да научат добро да пишуваат софтвер, учениците треба да читаат многу софтвер и да пишуваат многу софтвер. Тие треба да читаат и разберат вистински програми кои луѓето навистина ги користат. Тие ќе бидат мошне љубопитни да го читаат изворниот код на програмите кои тие ги користат.

Неслободниот софтвер ја одбива нивната жед за знаење; тој вели: „Знаењето кое го сакате е тајно--учењето е забрането!“ Слободниот софтвер ги поттикнува сите да учат. Заедницата на слободниот софтвер го одбива „свештеништвото на технологијата“, кое ја држи јавноста во незнаење за тоа како технологијата работи; ние ги охрабруваме учениците од било која возраст и ситуација да читаат изворен код и да учат колку што сакаат. Училиштата кои користат слободен софтвер ќе го поттикнат развојот на оние кои имаат дарба за работа со софтвер.

Следната причина е уште подлабока од претходната. Очекуваме училиштата да ги научат учениците на основни факти и корисни вештини, но тоа не е нивната комплетна задача. Најфундаменталната работа на училиштата е да ги научат луѓето да бидат добри граѓани и добри соседи--да соработуваат со други на кои им е потребна помош. Во областа на компјутерите, ова значи образување за тоа дека софтверот треба да се дели. Основните училиште, пред сите други, треба да им кажат на своите ученици: „Ако носите софтвер на училиште, мора да го делите со другите деца“. Секако училиштето мора да го практикува она што го проповеда: сиот софтвер инсталиран од училиштето треба да биде достапен за учениците да можат да го копираат, да го носат дома и да го редистрибуираат.

Образувањето на учениците да користат слободен софтвер и да бидат дел од слободен софтвер заедницата, е вистинска практична цивилна лекција. Тоа исто така ги запознава учениците со моделот на јавен сервис наместо со оној на моќните корпорации. Сите нивоа на образование треба да користат слободен софтвер.

1. RJ Reynolds компанијата за цигари беше казнета $15 милиони во 2002 за делење на бесплатни примероци цигари на настани наменети за деца. За повеќе информации видете: http://www.bbc.co.uk/worldservice/sci_tech/features/health/tobaccotrial/....

Забелешка: Англиската верзија на текстов може да се најде на http://www.gnu.org/philosophy/schools.html. Автор на текстов е Ричард Сталман, претседателот на Free Software Fondation и основачот на GNU проектот.

Вести:

Од стара страница

Образование